February 15, 2007
-
渣估今日去左老友 Willy位於又一村既一千呎屋企，感受一下有老婆有仔既男人幸福味道。同佢個五歲半大既仔祥仔傾偈, 係我既娛樂之一。細路仔真係好得意, 尤其是一d基因異常, 唔講野會死既靚仔, 渣估最愛。
渣估見親祥仔, 都洗佢腦，鼓勵佢讀多d書, 睇少d電視。我問佢：「祥仔, 知唔知點樣可以叻d呀? 」我諗住佢會話睇多d書…佢諗左五、六秒, 話:「睇電視。」我即刻呆左，然後好自然咁望一望有份生佢果位仁兄，條友眼定定在電腦前打緊機。
不過電視都有一個功能係書本做唔到既, 就係教到而家d細路講野好叻。我問祥仔： 「平時睇幾耐電視呀?」「睇…睇到媽咪叫訓覺。」細路仔腦部發育旺盛，善於模仿，Willy夫婦周不時都聽到祥仔講埋ｄ唔係細路仔講既野。五歲靚仔識講「應酬」，有冇可能?
Willy 幾乎每星期都買玩具俾祥仔玩, 呢種愛係好, 但係渣估覺得唔係好夠喎。渣估欣賞馬家輝，呢條友有個乖女, 七歲左右已經識得睇英文版哈利波特, 而且當其他同齡女童仲玩緊公仔既時候, 馬家輝個女一房都係書。閱讀馬家輝既blog，我感受到一個老豆，對女兒既悉心裁培, 付出既澎湃愛心，好溫暖。
祥仔雖然有自己既靚靚房間, 遊戲機、薯片、工人、靚衫靚鞋，過既係小皇爺既生活(細路仔著Ralph Lauren, Adidas 波鞋都有幾對．．．), 但係書架竟然只得兩本書。
祥仔平時接觸到刊有文字圖片既讀物, 可能就係客廳果堆壹、東、三周刊, 我望一望 Willy 同阿嫂呢對加埋月入六餅幾既小中產, 再望下呢個六歲唔夠既大頭仔，都有少少皺眉。
不過，我咩野身世，邊有資格講野?
〈追揸沽〉‧10.2.07
